ธาตุยมก

ปุจฺฉา – อภิธมฺมปิฏเก อาวุโส ฉฏฺเฐ ยมกปฺปกรเณ ทสสุ ยมเกสุ จตุตฺถํ ธาตุยมกํ ภควตา กถํ วิตฺถารโต วิภชิตฺวา เทสิตํฯ

วิสฺสชฺชนา – อภิธมฺมปิฏเก ภนฺเต ฉฏฺเฐ ยมกปฺปกรเณ ทสสุ ยมเกสุ จตุตฺถํ ธาตุยมกํ ‘‘อฏฺฐารส ธาตุโย – จกฺขุธาตุ โสตธาตุ ฆานธาตุ ชิวฺหาธาตุ กายธาตุ รูปธาตุ สทฺทธาตุ คนฺธธาตุ รสธาตุ โผฏฺฐพฺพธาตุ จกฺขุวิญฺญาณธาตุ โสตวิญฺญาณธาตุ ฆานวิญฺญาณธาตุ ชิวฺหาวิญฺญาณธาตุ กายวิญฺญาณธาตุ มโนธาตุ มโนวิญฺญาณธาตุ ธมฺมธาตู’’ติ เอวมาทินา ภควตา ปณฺณตฺติวารปวตฺติวารปริญฺญาวารสงฺขาเตหิ ตีหิ มหาวาเรหิ วิตฺถารโต วิภชิตฺวา เทสิตํฯ

สจฺจยมก

ปุจฺฉา – อภิธมฺมปิฏเก อาวุโส ฉฏฺเฐ ยมกปฺปกรเณ ทสสุ ยมเกสุ ปญฺจมํ สจฺจยมกํ ภควตา กถํ วิตฺถารโต วิภชิตฺวา เทสิตํฯ

วิสฺสชฺชนา – อภิธมฺมปิฏเก ภนฺเต ฉฏฺเฐ ยมกปฺปกรเณ ทสสุ ยมเกสุ ปญฺจมํ สจฺจยมกํ ‘‘จตฺตาริ สจฺจานิ – ทุกฺขสจฺจํ สมุทยสจฺจํ นิโรธสจฺจํ มคฺคสจฺจํฯ ทุกฺขํ ทุกฺขสจฺจํ, ทุกฺขสจฺจํ ทุกฺขํฯ สมุทโย สมุทยสจฺจํ, สมุทยสจฺจํ สมุทโยฯ นิโรโธ นิโรธสจฺจํ, นิโรธสจฺจํ นิโรโธฯ มคฺโค มคฺคสจฺจํ, มคฺคสจฺจํ มคฺโค’’ติ เอวมาทินา ภควตา วิตฺถารโต วิภชิตฺวา เทสิตํฯ